تحميل كتاب حكايات الروب الأسود pdf لأدهم العبودي

المجني عليه بيقول: “عندها شنب يا بيه وبتشخ وهي واقفة”!.
ده بالظبط اللي قاله المجني عليه اللي كنت حاضر معاه، ومقدرناش نمسك نفسنا من الضحك، لا أنا ولا وكيل النيابة، أولًا لإن المجني عليه بيقولها بجدية شديدة وحزن وانكسار حقيقي، ثانيًا لإنه كان صعبان علينا، وشه متشلفط وراسه متدغدغة، المتهمة كانت واقفة ووشها متداري في الطرحة، ردت على جوزها: ده إحنا بينا سبع عيال يا مفتري.. جبتهم إزاي؟ بالجوابات! وراحت باصة لوكيل النيابة: ده خمورجي ومجنون يا بيه ومبهدلني أنا والعيال.
مكنش ينفع استكمالًا لمسلسل الفكاهة السودا إني أطلب من الست تورينا شنبها، ده مالوش علاقة بالمحضر، المحضر إن الست قامت على راجلها في نوبة غضب وطحنته ضرب، وهو طلع يصرخ في الشارع، ووصل لغاية النقطة وطلع عمل تقرير طبي ورجع كمّل المحضر فبعتوا لمراته وعرضوا الاتنين على النيابة المسائية، معاهم بنات كبيرة بتدرس في الجامعة، كانت واحدة منهم في النيابة ومحرجة جدًا من شوفة أمها متكلبشة وأبوها متعوّر.
وكيل النيابة اتأكد إنه مجنون لمّا سأله: عايش معاها أكتر من عشرين سنة ودلوقتي خدت بالك من شنبها؟! فقاله: من يوم ما عضها الكلب يا بيه وهي متبدّلة.
طبعًا المحضر على بعضه مياخدش في التحقيق دقايق، لكن كمية الفكاهة كانت كافية إن وكيل النيابة ياخد راحته في الدردشة، وأنا كنت مكسوف، أول مرة أقابل المجني عليه بوصاية من واحد قريبه للحضور معاه، وحسيت إني بضيّع وقت جوّا في التحقيق، لكنّي اتدبست خلاص فمكمّل مكمّل، والسؤال اللي مكنش ينفع يتسأل هو السؤال عن قصة إن المتهمة بتشخ وهي واقفة دي، فوكيل النيابة استغرق في قصّة عضّة الكلب، المجني عليه قال: يا بيه في الأفلام الأجنبي مش فيه كلاب بتعض الناس وبيتحولوا؟! وكيل النيابة قاله: آه، فالراجل قال: أنا مراتي حوّلها كلب من يوم ما عضها.. وقلتلها تروح الوحدة تاخد الواحد وعشرين حقنة بس ما راحتش.
بعد نص ساعة وكيل النيابة شاف إن الصلح في المحضر هيكون أفضل، فقالي حاول ما بينهم، طلعت معاهم وقعدت أراضي في الراجل مرة وفي الست مرة، وكانت طلباتهم غريبة، هي طلبها إن جوزها يبطل يسهر مع فلان ويتطفح الزفت منقوع البراطيش، وهو مصرّ إنّها تحلق شنبها، وكان الحوار هزلي لدرجة إن أنا ذات نفسي تهت ما بينهم وما بين الطلبات العجائبية علشان نتمم الصلح، في النهاية قلت لبنتهم حاولي انتي معاهم علشان كده ميصحش.
تم الصلح بعد معاناة، واتخلى سبيل الست من النيابة، لكن الراجل وهم نازلين بص لبنته: وأمك هتحلق شنبها بالمكنة الجديدة اللي أنا شاريها.. طلاق لتحلقه يا إما أهج من البلد خالص ومتعرفوليش طريق جرة.

هذا الكتاب حاليا بالمكتبات وغير متوافر للتحميل بصيغة pdf